Се уредува зеленилото на две локации во Градскиот парк

По налог на Град Скопје, ЈП „Паркови и зеленило“, поради поволните временски услови, почна да ја реализира програмата за подигање и реконструкција на јавното зеленило на подрачјето на град Скопје.

Како што се наведува во соопштението од Град Скопје, екипите на „Паркови и зеленило“ се излезени на терен и работат на уредување на зеленилото на две локации во Градскиот парк.

„Првата локација спроти хотел ‘Канет’ и езерцето кај стадионот е со површина од 4.400 квадрантни метри, а втората површина од 1.900 квадратни метри е спроти паркингот пред фонтаната „Лотосов цвет“ и влезот во Градскиот парк бидејќи постојната тревна површина е од пред 40 години и е со надмината физиолшка старост“, информираат од Градот.

На двете површини ќе се засадат 200 украсни грмушки, перени и листопадни садници, што ќе ги надополнат постојните дрвореди.

Исто така, на новите површини ќе се постави и нова хидрантска мрежа од 700 метри, ќе се заменат оштетените прскалки и ќе се постават нови во делот каде што никогаш немало поставено прскалки за наводнување на зеленилото во вкупен број од 70 парчиња. За реконструкција на овие две површини во Градскиот парк од буџетот на Град Скопје ќе се издвојат околу 4.500.000 денари.