Суд во Франција расправа дали 11-годишно дете може да се согласи на секс

Може ли 11-годишно дете слободно да прифати сексуален однос со 28-годишен маж? Ова прашање ќе биде во средиштето на судењето што денеска почнува во Понтоис, регион на Париз, во време кога со предлог-закон се предвидува воведување минимална возраст за согласност на секс.

Аферата предизвика жестока дебата во Франција. Имено, минатата година на 24 април 11-годишно девојче дошло во стан на човек што претходно двапати ѝ пришол. Во станот на човекот тие имале сексуални односи.

Нејзините родители поднеле тужба за силување опишувајќи го преплашеното дете неспособно да се брани, шокирано од тоа што се случувало.

Сепак, обвинителството сметало дека не станува збор за силување бидејќи односот бил доброволен и бил извршен без никаков физички притисок врз малолетното девојче, кое по сопствена волја отишло во станот на човекот.

Оценувајќи дека немало насилство, принуда, закани или изненадувања, обвинителството одлучило кривично да го гони човекот, инаку татко на две деца, поради полов однос забранет со закон дефиниран како полов напад врз малолетник на возраст до 15 години. Врз основа на ова кривично дело нему му се закануваат пет години затвор.

Сепак, судската постапка би можела повторно да се врати на почеток бидејќи родителите на девојчето бараат мажот кривично да се гони за силување за што е предвидена затворска казна во траење од 20 години.

Во Франција пeриодов актуелни беа уште две вакви афери: Oслободување на 30-годишен маж обвинет за силување на 11-годишно девојче, односно казна од 18 месеци затвор за наставник што бил во врска со својата 14-годишна ученичка.

Овие случаи беа поттик за одлуката на француската влада да се воведе минимална возраст за согласност на сексуален чин, која претседателот Емануел Макрон предлага да биде 15 години. Предлог-законот против сексистичкото и сексуалното насилство, со кој би требало да се утврди овој праг, се очекува пред Советот на министрите да се најде на 7 март. Во меѓувреме француското Министерството за правда задолжи мултидисциплинарна комисија да придонесе за дебатата. Група експерти, вклучувајќи адвокати и лекари, треба да го дадат своето мислење до 1 март годинава.