Продолжуваат преговорите за името во Њујорк

Министрите за надворешни работи на Македонија и на Грција, Никола Димитров и Никос Коѕијас, денеска во Њујорк треба да ги продолжат разговорите со медијаторот на Обединетите нации за спорот со името, Метју Нимиц. Се очекува средбата да започне во 9 и 30 часот по локално време, односно во 15 и 30 часот по македонско време.

По средбата се очекува министрите да дадат изјави. Тоа што е познато е дека Македонија во оваа рунда преговори замина со предлогот за Република Илинденска Македонија кој на јавноста ѝ го претстави премиерот Зоран Заев по средбата со неговиот грчки колега Алексис Ципрас во Софија. Овој предлог, сепак, според пишувањата на грчките медиуми, не е прифатлив за Грција која упорно бара име со временска или географска одредница. Грција, исто така, порача дека ќе преговара само врз основа на четирите предлози на Нимиц: Република Северна Македонија, Република Горна Македонија, Република Вардарска Македонија и Република Македонија (Скопје).